ភ្នំពេញ៖ ក្រសួងធនធានទឹក និងឧតុនិយមបានប្រាប់ឱ្យដឹងថា កម្ពុជានឹងបន្តទទួលរងឥទ្ធិពលពីទ្រនុងនៃសម្ពាធខ្ពស់ពីចិននៅក្នុងកម្រិតបង្គួរ និងខ្យល់មូសុងឦសាន្តក្នុងកម្រិតមធ្យម។ ស្ថានភាពនេះនឹងធ្វើឱ្យកម្ពុជាបន្តចុះត្រជាក់ចាប់ពីថ្ងៃទី២៨ ខែធ្នូ ដល់ថ្ងៃទី៣ ខែមករា ឆ្នាំ២០២៣។
នៅតំបន់ទំនាបកណ្តាល ធាតុអាកាសចុះត្រជាក់ក្នុងកម្រិតមធ្យម ក្នុងសីតុណ្ហភាពអប្បបរមា មានពី ១៨-២២អង្សា និងសីតុណ្ហភាពអតិបរមា មានពី ២៨-៣២អង្សា។
នៅតំបន់ខ្ពង់រាប ធាតុអាកាសចុះត្រជាក់ក្នុងកម្រិតបង្គួរសីតុណ្ហភាពអប្បបរមា មានពី ១៥-១៩អង្សា និងសីតុណ្ហភាពអតិបរមា មានពី ២៨-៣២អង្សា។ ក្នុង ខេត្តមណ្ឌលគិរី ខេត្តរតនគិរី ខេត្តព្រះវិហារ និងខេត្តឧត្តរមានជ័យ សីតុណ្ហភាពអប្បបរមា មានក្នុងរង្វង់ ១៥-១៧អង្សា នាពេលព្រឹក និងយប់។
ចំណែកនៅតំបន់មាត់សមុទ្រមានអាកាសធាតុចុះត្រជាក់ក្នុងកម្រិតខ្សោយ ដោយសីតុណ្ហភាពអប្បបរមា មានពី ១៩-២២អង្សា និងសីតុណ្ហភាពអតិបរមា មានពី ២៩-៣២អង្សា។
ក្រសួងធនធានទឹក និងឧតុនិយមបានអំពាវនាវដល់ប្រជាពលរដ្ឋ សូមយកចិត្តទុកដាក់ប្រុងប្រយ័ត្ន ព្រមទាំងថែរក្សាសុខភាព ចំពោះស្ថានភាពធាតុអាកាសដែលនៅតែបន្តចុះត្រជាក់៕
